„Það var bara mjög erfitt,“ segir Jón Daði Böðvarsson landsliðsmaður Íslands í knattspyrnu í viðtali við tímarit sem Ljósið gefur út. Ljósið er endurhæfingar- og stuðningsmiðstöðvar fyrir fólk sem hefur fengið krabbamein, og aðstandendur þess.
Móðir Jóns Daða hefur í tvígang háð baráttu við krabbameinið. Jón Daði og Ingibjörg Erna Sveinsdóttir móðir hans ræða málið við Ljósið.
Ingibjörg greindist fyrst með krabbamein árið 2017. EInu og hálfi ári síðar greindist hún svo aftur en þá var hún stödd á Englandi hjá Jóni Daða þar sem hann hefur spilað sem atvinnumaður í knattspyrnu síðustu ár.
„Mamma vildi bara drífa sig strax heim og við studdum hana í því,“ segir Jón Daði. „Já, ég vildi bara klára þetta sem allra fyrst,“ bætir Ingibjörg Erna við.
Jón Daði segir að það sér erfitt að sjá mömmu sína fara í svona baráttu við meinið. „Þegar maður fær svona fréttir gleymir maður stund og stað, maður er í sjokki, líður illa, er áhyggjufullur,“ segir Jón Daði. „En ég hafði trú á því að þetta myndi ganga vel. Ég var jákvæður og tilbúinn að rétta henni hjálparhönd.“
Jón Daði segir að mamma sín hafi unnið góðan sigur í baráttu við krabbameinið og sé betri í dag en áður. „Mamma kom eiginlega miklu betri út úr þessu en áður en hún greindist með krabbameinið.“