Leitin að næsta landsliðsþjálfara Íslands í karlaflokki er í fullum gangi, sambandið hefur rætt við þá aðila sem koma til greina og mun á næstu dögum eða vikum hefja formlegar viðræður við þann aðila sem sambandið vill fá til starfa.

„Það eru í raun engar fréttir að færa yfir því, við erum í miðju ráðningarferli,“ sagði Guðni Bergsson formaður KSÍ í samtali við okkur í dag.

Arnar Þór Viðarsson þjálfari U21 árs landsliðsins og yfirmaður knattspyrnumála hjá sambandinu hefur sterklega verið orðaður við starfið. Samkvæmt heimildum er sambandið með 3-4 nöfn á sínu blaði og kannar hug þeirra. Arnar er þar á meðal

„Þetta tekur þann tíma sem það þarf að taka, það er reynt að vanda til verka. Við ræðum við þá aðila sem koma til greina, förum í gegnum það ferli. Það tekur einhvern tíma.“

Guðni staðfesti að sambandið hefði rætt við bæði íslenska og erlenda þjálfara um að taka við en hvaða atriði er rætt um í þeim þreifingum. „Bæði hug þeirra aðila til landsliðsins og hvaða hugsjón þeir hafa fyrir starfinu.“

Guðni vonast til þess að sambandið ljúki þessari vinnu fyrir áramót. „Það væri æskilegt að klára þetta á þessu ári, ég held að við ættum að geta náð því. Ef það dregst eitthvað inn á nýtt þá eru bara ástæður fyrir því, við erum að vanda til verka til að fá rétta teymið inn í þetta.“

Erik Hamren lét af störfum í síðasta mánuði, hann ákvað að stíga til hliðar án þess að viðræður færu af stað eftir að honum mistókst að koma liðinu inn á Evrópumótið.