Kjartan Henry Finnbogason, leikmaður AC Horsens, var í byrjunarliði og skoraði annað mark liðsins í 3-1 sigri gegn sínu fyrrum félagi, Vejle í dönsku úrvalsdeildinni í dag. Ágúst Hlynsson, kom inn á sem varamaður fyrir Kjartan á 87. mínútu.
Louka Prip, kom Horsens yfir með marki úr vítaspyrnu á 8. mínútu.
Á 41. mínútu var röðin komin að Kjartani Henry er hann tvöfaldaði forystu Horsens.
Á 49. mínútu skoraði síðan Jannik Pohl sitt annað mark í leiknum með marki úr vítaspyrnu.
Wahid Faghir minnkaði muninn fyrir Vejle með marki á 92. mínútu leiksins en nær komst Vejle ekki.
Fleiri mörk voru ekki skoruð í sigri Horsens sem hefur líklegast reynst Kjartani Henry afar sætur. Hann gekk til liðs við Horsens frá Vejle í október eftir að hafa fengið lítinn spilatíma hjá síðarnefnda félaginu.
Kjartan fékk samningi sínum við Vejle rift en hann var úti í kuldanum hjá knattspyrnustjóra liðsins eftir að hafa gagnrýnt liðsval hans.
Horsens er eftir sigurinn í 11. sæti dönsku úrvalsdeildarinnar með 6 stig eftir 10 leiki.
