Kjartan Henry Finnbogason rifti samningi sínum við Vejle í Danmörku í gær og getur því samið við nýtt félag þrátt fyrir að félagaskiptaglugginn hafi lokað í gær.
Þessi 34 ára framherji hefur verið í kuldanum hjá Vejle síðustu vikur eftir að hafa gagnrýt liðsval eftir fyrsta leik.
Kjartan skoraði 17 mörk í B-deildinni í Danmörku í fyrra og átti stóran þátt í því að liðið komst upp í efstu deild.
„Það voru allir aðilar sammála um að rifta samningi Kjartan svo að hann geti fengið að spila,“ sagði Jacob Kruger yfirmaður knattspyrnumála hjá Vejle.
Kjartani var þakkað fyrir sitt framlag en framherjinn hefur verið orðaður við uppeldisfélag sitt KR. Kjartan yfirgaf KR árið 2014 og hefur síðan þá spilað í Danmörku og í Ungverjalandi.