Breski miðillinn Mirror, segir frá því á vefsíðu sinni í dag að Juventus leiði kapphlaupið um kaup á Íslendingnum efnilega, Ísaki Bergmanni Jóhannessyni, leikmanni Norrköping í Svíþjóð.
Mirror segir frá því að Manchester United sé þessa stundina að missa af möguleikanum á að kaupa leikmanninn en enska félagið hefur verið að fylgjast með leikmanninum undanfarið.
Ísak hefur sjálfur sagt að það væri draumur að spila fyrir Manchester United en hann bjó á sínum tíma í Manchester þegar Jóhannes Karl, faðir hans, spilaði sem atvinnumaður í Englandi.
Það er talið að fjölmörg stórlið séu á eftir Ísaki en ítölsku meistararnir í Juventus eru sagðir hafa aukið áhuga sinn á Íslendingnum.
Talið er að Norrköping vilji fá að minnsta kosti 5 milljónir punda fyrir leikmanninn, það samsvarar í kringum 905 milljónum íslenskra króna.
Ísak lék á dögunum sinn fyrsta A-landsleik fyrir Ísland í tapi gegn Englandi í Þjóðadeildinni.
Man Utd risk losing 17-year-old wonderkid despite Old Trafford „dream“https://t.co/Hhi9mLqfP3
— Mirror Football (@MirrorFootball) November 22, 2020