Nýjar og hertar reglur í Bretlandi hafa orðið til þess að knattspyrnumenn verða að fá mat sinn sendan upp á herbergi þegar lið koma saman á hóteli.
Herbergisþjónusta er það eina sem er í boði á næst vikum vegna COVID-19 samkvæmt regluverki ríkisstjórnarinnar. Félög í ensku úrvalsdeildinni hafa mótmælt þessu og reyna að fá þessu breytt.
Stór hluti liða fer inn á hótel degi fyrir leik og snæðir þar saman og síðan er fundað um komandi verkefni.
Útgöngubann er í Bretlandi en atvinnumenn í íþróttum fá að halda áfram með sitt en regluverkið í kringum þá er mikið.
Þetta nýjasta útspil vekur athygli en leikmennirnir eru saman öllum stundum á æfingum og í leikjum, en er bannað að borða saman á hóteli.