Gareth Southgate er ekki í miklu uppáhaldi hjá Mido eftir samstarf þeirra hjá Middlesbrough. Mido lék undir stjórn Southgate hjá félaginu.
Framherjinn fyrrverandi frá Egyptalandi segir að enska landsliðið eigi að reka Southgate úr starfi, hann sé í raun vonlaus þjálfari.
„England þarf alvöru stjóra, það er verið að eyða tíma í vitleysu með Southgate,“ sagði Mido sem var umdeildur á sínum ferli, stundum sagður latur.
„Það er rétt að Southgate segir alltaf réttu hlutina í fjölmiðlum, það hefur líklega haldið honum í starfi hingað til. Trúið mér, hann stamar í öllum ræðum þar sem liðið er undir. Leikmenn skynja hræðsluna í honum.“
Mido fer svo yfir samstarf þeirra hjá Middlesbrough. „Ég man eftir honum hjá Boro, hann var skíthræddur þegar við vorum að berjast í fallbaráttu. Það var hans fyrsta starf en svona breytist ekki. Ef þú ert hræddur við að tapa fótboltaleik, þá hættir það ekki. Leikmenn finna þetta.“
„England er með mikla hæfileika en þeir þurfa þjálfara með alvöru karakter. Einhver sem fær leikmenn til að njóta sín og spila án hræðslu. Southgate gerir það ekki.“
Hann lagði svo til að Jose Mourinho yrði ráðinn til starfa og að Southgate færi á skrifstofuna og yrði gerður að stjórnarformanni sambandsins.
