Ensk blöð greina frá því að óttast sé að Joe Gomez varnarmaður Liverpool spili ekki meira fótbolta á þessu tímabili. Alvarleg hné meiðsli á æfingu enska landsliðsins komu upp í gær.
Ensk blöð segja að óttast sé að Gomez verði lengi á sjúkrabekknum, talið er að hann spili ekki meira með Liverpool á þessu tímabili og að hann eigi ekki möguleika á að ná sér fyrir Evrópumótið næsta sumar.
Atvikið kom eins og fyrr segir upp á æfingu enska liðsins í gær en enginn var í kringum Gomez. „Hann sendi boltann og það var enginn í kringum hann, hann endaði í jörðinni og var sárþjáður,“ sagði Nick Pope markvörður landsliðsins um atvikið.
„Sem knattspyrnumaður þá skynjaru strax þegar eitthvað svona óeðlilegt á sér stað, það sást um leið að hann var sárþjáður. Það er erfitt að horfa upp á vin og liðsfélaga þjást svona.“
Gareth Southgate vildi ekki ræða alvarleika meiðslanna en Gomez er nú í skoðun hjá læknum Liverpool. „Ég get ekki sagt hversu alvarlegt þetta er því hann þarf að fara í myndatöku. Það sem hræðir mann er að það var enginn nálægt honum og hann var mjög þjáður.“
Ljóst er að Jurgen Klopp stjóri Liverpool þarf að kaupa miðvörð í janúar ef fréttirnar um Gomez reynast réttar því áður hafði Virgil van Dijk slitið krossband og spilar ekki meira á þessu tímabili.
