Það var fjörugur þáttur á Stöð2 Sport í gær þar sem Guðmundur Benediktsson stýrði Stúkunni þar sem farið var yfir efstu deild í knattspyrnu karla. Til umræðu var leikur Breiðabliks og Fylkis sem fram fór á sunnudag.
Breiðablik vann góðan 3-1 sigur þar sem Brynjólfur Willumsson skoraði tvö mörk, þessi ungi sóknarmaður hefur mikið verið til umræðu í sumar en fyrra mark hans var það fyrsta úr opnum leik í sumar.
Guðmundur vakti athygli á því að Stöð2 Sport hefði beðið um að fá að ræða við Brynjólf að leik loknum en Óskar Hrafn Þorvaldsson, þjálfari Blika var ekki á því. Hann bannaði sóknarmanninum að fara í viðtal
„Ég skil það ekki, fjölmiðlamaðurinn í mér og fjölmiðlamaðurinn í Óskari. Hann veit að menn vilja fá Brynjólf í viðtal sem er skemmtilegur í tilsvörum og gefur eitthvað af sér. Það selur deildina að hafa skemmtilega menn í viðtölum. Mér finnst þetta skrýtið,“ sagði Máni Pétursson sérfræðingur Stúkunnar um málið.
Guðmundur sagði frá því að hann hefði eitt sinn verið í teymi sem hefði tekið álíka ákvörðun. Guðmundur var þá aðstoðarþjálfari KR, hann og Bjarni Guðjónsson bönnuðu þá Gary Martin framherja liðsins að fara í viðtal. ,,Ég var hluti af þjálfarateymi sem ákvað að leyfa Gary Martin ekki að fara í viðtal, ég er ennþá á því að það hafi verið stórkostlegt,“ sagði Guðmundur léttur.
Máni benti á að enginn læti hafi verið í leiknum og því sjái hann ekki ástæðu þess að Brynjólfi sé meinað að ræða við fréttamenn. ,,Mér fannst ekkert vera í þessum leik til að þú takir ákvörðun um að hann færi ekki í viðtal.“