Samkvæmt heimildum götublaða á Englandi þá gæti senegalski varnarmaðurinn Kalidou Koulibaly, leikmaður Napoli á Ítalíu, verið á leiðinni til Liverpool í janúar. Liverpool glímir nú við skort á miðvörðum eftir að Virgil van Dijk meiddist í leik liðsins gegn Everton. Varnarsinnaði miðjumaðurinn Fabinho hefur spilað í miðverðinum í síðustu leikjum með fínum árangri en breiddin í vörninni hjá Liverpool er ekki nógu mikil.
Sadio Mané, leikmaður Liverpool, er frá Senegal líkt og Koulibaly. Mané segir að hann verði ánægður ef landi hans gengur til liðs við Liverpool. „Ég verð mjög ánægður ef ég fæ að spila með honum þar sem ég hef þekkt hann í mörg ár. Ekkert félag myndi ekki vilja hafa Koulibaly í liðinu sínu,“ sagði Mané.
Koulibaly er þó ekki ánægður með þessa orðróma. „Ég hef aldrei talað við Napoli um að fara þaðan,“ sagði Koulibaly þegar hann var spurður út í sögusagnirnar um að hann væri á förum. „Ég vil bara hugsa um að spila. Það fer í taugarnar á mér að heyra að ég sé að fara, á hverjum degi, í þetta og hitt félagið í Evrópu.“