Rúnar Alex Rúnarsson spilaði allan leikinn í marki Arsenal í öruggum 3-0 sigri gegn Dundalk í Evrópudeildinni í gær.
Arsenal gerði út um leikinn á nokkurra mínútna kafla. Edward Nketiah skoraði fyrsta mark leiksin á 42. mínútu. Annað mark Arsenal skoraði Joseph Willock á 44. mínútu. Arsenal gátu gengið sáttir til hálfleiks.
Þeir byrjuðu síðari hálfleik af krafti. Þriðja mark Arsenal kom á 46. mínútu. Þar var að verki Nicolas Pépé. Fleiri mörk voru ekki skoruð og Rúnar Alex getur fagnað góðum sigri í sínum fyrsta leik með Arsenal. Arsenal er með fullt hús stiga eftir tvo leiki.
Rúnar Alex hafði ekki mikið að gera í leiknum en fær fína dóma í enskum blöðum fyrir frumraun sína. „Það er ólíklegt að Rúnar muni hafa minna að gera í næsta leik, þessi íslenski landsliðsmaður var að spila sinn fyrsta leik og það reyndi lítið á hann,“ skrifar London Evening Standard sem gefur Rúnari sex í einkunn.
„Það er erfitt að draga stóran lærdóm af þessari frammistöðu og hæfileikum, það sem hann þurfti að gera var vel gert. Rúnar fékk skot á sig snemma leiks af löngu færi og var öruggur þegar fyrirgjafir komu.“
„Það sem vakti mesta athygli var staða hans á vellinum þegar Arsenal var með boltann, hann er þekktur fyrir gæði í löppunum og vildi vera með. Hann var oft kominn vel út fyrir vítateig.“
„Það koma stærri próf fyrir Rúnar en hann stóðst þetta án vandræða.“