Lífið hjá Mason Greenwood framherja Manchester United og enska landsliðsins gengur ekki vel fyrir sig þessa dagana. Eftir einnar nætur gaman og brot á sóttvarnarreglum í Reykjavík hefur Greenwood einnig komið sér í klípu hjá félagsliði sínu.

Greenwood og samlandi hans Phil Foden komust í heimsfréttirnar eftir að þeir buðu tveimur íslenskum stúlkum á hótel sitt í september og brutu þar sóttvarnarreglur. Þeir voru reknir úr landsliðinu vegna þess og voru ekki valdir nú í október þegar enska landsliðið kom saman aftur.

Greenwood hefur svo ekki fundið taktinn með Manchester United í upphafi tímabils og hefur ekki verið í leikmannahóp liðsins í sigrum gegn Newcastle og svo PSG í gær.

Ole Gunnar Solskjær stjóri Manchester United hefur sagt að Greenwood sé lítillega meiddur en ef marka má ensk blöð er ekki svo.

Sagt var frá því að Greenwood hafi verið að mæta of seint til æfinga og blöðin fara svo nánar út í mál hans í dag. Þar segir að 18 ára sóknarmaðurinn hafi í tvígang mætt of seint til æfinga með stuttu millibili.

Þá hefur Ole Gunnar Solskjær stjóri liðsins verið mjög ósáttur með viðhorf leikmannsins og látbragð á þessu tímabili. Þeir hafa fundað reglulega eftir heimskupör hans í Reykjavík.

Eftir að hafa verið frábær á síðustu leiktíð þarf Greenwood nú að vinna sér inn traust hjá stjóra sínum á nýjan leik.

Enski boltinn á 433 er í boði