Hinn 28 ára gamli Edouard Mendy er eini afríski markmaðurinn í efstu deild á Englandi. Hann kemur frá Senegal en gekk til liðs við Chelsea í september.
Í viðtali við Sky Sports segist Mendy ekki vita hvers vegna aðrir markmenn frá Afríku hafa ekki fengið tækifæri í efstu deild á Englandi.
„Þegar litið er á aðrar deildir í Evrópu eru afrískir markmenn að spila þar. Í Frakklandi eru að minnsta kosti fjórir eða fimm. Það er kannski hægt að útskýra þetta með einhverjum hætti.“
Mendy bendir á að margir leikmenn frá Afríku spili í efstu deild á Englandi, sem sé sú besta í heimi. Hann finnur ekki fyrir pressu en er mjög stoltur af því að vera markmaður frá Afríku í ensku úrvalsdeildinni. „Það er undir mér komið að sýna, sem afrískur markmaður, að ég geti í raun og veru staðið mig vel á þessu stigi og mögulega breyta hugarfari manna í sambandi við þessa hluti.“
„Ég þarf að halda áfram að vinna og gera mitt besta í leikjum. Þá geta aðrir markmenn fetað í fótspor mín og spilað í þessari deild.“
Fyrir sex árum síðan var Mendy án liðs á atvinnuleysisbótum. „Þetta var mjög erfitt. Ég var mjög reiður vegna þess að ég var án liðs vegna umboðsmanns míns. Ég var líka reiður því ég gat ekki spilað um helgar og gert það sem ég elskaði.“
Mendy var á atvinnuleysisbótum til að geta helgað líf sitt æfingum í þessu millibilsástandi. Á þessum tíma átti hann von á sínu fyrsta barni.
„Atvinnuleysisbæturnar voru ekki að fara að duga okkur þannig að ég byrjaði að leita mér að vinnu. Þá fékk ég tækifæri á að fara til Marseille.“ Mendy fór á reynslu til Marseille og fékk samning. Frá Marseille fór Mendy til Reims og síðan til Rennes.
Hjá Rennes hitti Mendy fyrir markvörðinn Petr Cech. Eftir tímabil Mendy hjá Rennes fékk hann tilboð frá Chelsea. Þar spilaði Cech stórt hlutverk.
„Það er rétt að Cech spilaði mikilvægt hlutverk í félagaskiptunum. Nú er það undir mér komið að sýna þeim að þeir gerðu réttan hlut með því að fá mig í félagið,“ segir Mendy.
Enski boltinn á 433 er í boði 
