Mikel Arteta, knattspyrnustjóri Arsenal, segir að Mesut Özil, leikmaður félagsins, hafi fengið sanngjarna meðferð hjá sér. Það varð ljóst í gær að Özil yrði ekki hluti af úrvalsdeildarhóp Arsenal.
„Þetta er ákvörðun mín út frá knattspyrnulegum ástæðum. Hann hefur fengið sín tækifæri eins og aðrir leikmenn hjá félaginu. Ég er sorgmæddur yfir því að þurfa skilja leikmenn eftir utan hóps,“ sagði Arteta í viðtali sem birtist á heimasíðu Arsenal.
Arteta segist taka fulla ábyrgð á þessari ákvörðun, það sé hann sem eigi að ná því besta út úr leikmönnum sínum.
„Ég tek ákvarðanir með það til hliðsjónar að ná því besta úr leikmannahópnum og ná í úrslit. Til þess að gera það reyni ég að vera sanngjarn við hann (Özil) og aðra leikmenn með það markmið að vernda hagsmuni félagsins,“ sagði Arteta.
Knattspyrnustjórinn segir að honum hafi mistekist að ná því besta úr leikmanninum.
„Ég á að ná því besta út úr leikmönnum mínum. Mér finnst ég að eitthverju leyti hafa brugðist því ég vil besta Özil fyrir liðið, ég var nálægt því í nokkur skipti en á heildina litið hef ég ekki náð því og hef þurft að skilja hann eftir utan hóps,“ sagði Arteta
Mesut Özil var skiljanlega ekki sáttur með að hafa ekki verið valinn í úrvalsdeildarhópinn og birti færslu á Twitter til að viðra þá skoðun sína.
„Það er erfitt að skrifa stuðningsmönnum Arsenal þessi skilaboð eftir að hafa verið hérna um langt skeið. Ég er sár yfir þeirri staðreynd að ég komist ekki í þennan hóp fyrir ensku úrvalsdeildina, ég skrifaði undir nýjan samning við Arsenal árið 2018 og vildi þar sanna ást mína og hollustu við félagið. Það særir mig að fá það sama ekki til baka, það er lítið traust,“ sagði í færslu Özil á Twitter.