BDS er alþjóðleg hreyfing sem hvetur til sniðgöngu, efnahagsþvingana og afturköllunar fjárfestinga í Ísrael þar til stjórnvöld þar í landi fylgja alþjóðalögum og virða mannréttindi Palestínumanna að fullu. BDS á Íslandi deildi myndbandi fyrir nokkrum dögum þar sem útskýrt var hvers vegna það að styðja við Puma jafngildi, að þeirra sögn, því að styðja við þau mannréttindabrot sem framin eru í Ísrael.
Mbl.is vakti athygli á myndbandinu sem BDS á Íslandi deildi í gær. „Knattspyrnusamband Íslands hefur gert samning við íþróttavöruframleiðandann PUMA um landsliðsbúninga. Það þýðir að næstu sex árin mun íslenska landsliðið í knattspyrnu spila undir merkjum Puma,“ segir í lýsingu myndbandsins sem birt var á Facebook.
„Puma er stoltur styrktaraðili landtökubyggða og hernáms, aðskilnaðarstefnu og mannréttindabrota ísraelskra stjórnvalda,“ segir einnig í lýsingunni og í myndbandinu er tekið fram að sex knattspyrnufélög innan sambandsins séu staðsett í ísraelskum landtökubyggðum. „Knattspyrnufélög í ísraelskum landtökubyggðum stuðla að mannréttindabrotum,“ segir í myndbandinu. Þá er einnig sagt frá því að fyrirtækið Delta Israel sé með einkaleyfi Puma þar í landi. „Delta er með útibú í ólöglegum landtökubyggðum.“
Í samtali við DV sagði Guðni Bergsson, formaður KSÍ, að hann væri ekki sáttur með þessa skýringu hjá BDS Ísland. „Ég er ekki sammála henni,“ sagði Guðni og tók það fram að Ísrael væri, líkt og Palestína, hluti af knattspyrnusamfélaginu. „Í sjálfu sér þá vorum við ekki með í huga þessa tengingu hjá PUMA við Ísrael,“ sagði Guðni síðan.
Þá vildi hann einnig koma á framfæri öðru sjónarmiði. „Ég held að það sé almenn stefna í íþróttasamfélaginu að halda íþróttum og pólítík aðskildum, ég held að það sé sjónarmið sem megi hafa í huga í þessu.“
