KSÍ hefur sent frá sér yfirlýsingu vegna kórónuveirusmit sem greindist í leikmanni Breiðabliks. Andrea Snæfeld Hauksdóttir kom til landsins 17 júní og var ekki með smit samkvæmt prófi sem hún gekkst undir í Keflavík.
433.is hefur fengið staðfest að Andrea fór í skimun á Keflavíkurflugvelli en fékk þar próf um að hún væri ekki með smit. Hún fékk svo fréttir af smituðum einstaklingi sem hún hafði umgengist í Bandaríkjunum. Hún fór aftur í próf eftir þær fréttir og fékk þar staðfest smit.
KSí skoðar nú næstu skref er varðar leiki í efstu deild kvenna en ljóst er að fresta þarf leikjum Breiðabliks og KR sem mættust í fyrradag en leikmenn beggja liða eru nú farnir í sóttkví.
Frá KSÍ:
Breiðablik og KR mættust í Pepsi Max deild kvenna 23. júní síðastliðinn. Leikmaðurinn sem um ræðir í fréttatilkynningu Almannavarna tók þátt í þeim leik. Mögulegt er að þetta muni hafa áhrif á næstu umferðir í deildinni. KSÍ mun nú skoða næstu skref og gefa út viðeigandi tilkynningu um framvindu mótsins eins fljótt og mögulegt er.
