„Faðir minn er dökkur að hörund. Fyr­ir sam­fé­lag­inu er ég hvít kona, svo ég upp­lifi ekki það sem faðir minn þarf að ganga í gegn­um,“ skrifar Chantel Jones Íslandsvinur og fyrrum markvörður Þórs/KA á Facebook.

Ástæðan fyrir skrifum Chantel er enn eitt málið varðandi dauða svarts manns af völdum lögreglunnar er komið upp í Bandaríkjunum og hefur verið efnt til mótmæla vegna málsins. Fjórum lögreglumönnum hefur verið vikið úr starfi vegna málsins og alríkislögreglan FBI rannsakar málið. „Ég næ ekki andanum.“ Var eitt af því síðasta sem maðurinn, hinn fertugi George Floyd, sagði á mánudaginn áður en hann lést. Hann lá þá ber að ofan á götu úti í Minneapolis. Búið var að handjárna hann en lögreglumaður hélt honum föstum á götunni með því að þrýsta hné sínu á háls hans og hnakka.

Atburðurinn var tekinn upp og hefur myndbandið vakið mikinn óhug en það hefur verið í mikilli dreifingu á netinu. Ekki sést á upptökunni hvað gerðist áður Floyd var handtekinn.

Chantel er grátandi á mynd sem hún birtir af sér með pistli sínum, hún óttast að faðir sinn lendi í svona atviki. „Svona lít ég út í hvert skipti sem ég tala við föður minn í símann. Ég græt af því ég veit ekki hvort þetta verði okkar síðasta samtal. Ég segi hon­um að passa sig þegar hann fer úr húsi og að klæða sig ekki eins og hann sé eitthvað grunsamlegur.“

„Hann var að kaupa sér sportbíl og ég óttaðist að hann færi að keyra of hratt og yrði stoppaður. Ég hræðist það á hverjum degi.“

,,Ég mun ekki þegja,“ skrifar Chantel að lokum.