Kristján Jónsson, blaðamaður á Morgunblaðinu bendir á skemmtilega staðreynd á Twitter síðu sinni er varðar KR-inga á Hlíðarenda.
KR og Valur hafa í gegnum árin verið miklir erkifjendur, tvö stærstu félög Reykjavíkur hafa eldað grátt silfur saman innan vallar. Sigursæl félög með mikla hefð en nú eru KR-ingar farnir að stjórna miklu hjá Val.
Finnur Freyr Stefánsson var í gær ráðinn þjálfari karlaliðs Vals í körfubolta, hann ólst upp Í KR. Heimir Guðjónsson var ráðinn þjálfari karlaliðs Vals í fótbolta í vetur, hann ólst einnig upp í KR.
Ágúst Jóhannsson þjálfar kvennaliðs Vals í handbolta og ólst likt og Finnur og Heimir upp í KR. Þá er Pétur Pétursson, þjálfari kvennaliðs Vals í fótbolta með miklar og sterkar tengingar við KR eftir dvöl sína hjá félaginu sem leikmaður og þjálfari.
Þrír þjálfarar af sex meistaraflokksliðum Vals eru uppaldir í KR: Gústi, Heimir og Finnur. Sá fjórði Pétur Pé setti mikinn svip á KR. Þessi staða er örugglega mjög vinsæl í 107.
— Kristján Jónsson (@KristjanJons) May 4, 2020