Emil Hallfreðsson kemur til Íslands í dag frá Ítalíu og fer í 14 daga sóttkví, hann getur því tekið þátt í landsleik Íslands og Rúmeníu sem fram fer 26 mars. Fótbolti.net segir frá.

Birkir Bjarnason er hins vegar áfram á Ítalíu en hann leikur með Brescia, félagið hefur ekki gefið KSÍ leyfi til að fá hann heim.

Ef Birkir kemur ekki til landsins á morgun þá er nokkuð ljóst að hann nær ekki að fara í 14 daga sóttkví fyrir leikinn, eins og reglur eru um vegna kórónuveirunnar.

„Við leitum allra leiða til að leita lausna til að koma Birki sem fyrst til landsins,“ sagði Klara Bjartmarz, framkvæmdastjóri KSÍ, við Fótbolta.net í dag.

,,Það sem gildir varðandi sóttkví í dag gildir ekki endilega á morgun. Mögulega eru einhverjar skimanir og þess háttar.“