Jamie Carragher, goðsögn Liverpool, segir að stuðningsmenn liðsins myndu íhuga að selja Mo Salah fyrir um 130 milljónir punda.

Carragher segir að Salah fái ekki sömu ást og aðrir leikmenn liðsins sem kæmi ekki til greina að selja í sumar.

,,Ég held að utan frá þá sé horft á hann sem leikmann í heimsklassa en hann fær ekki alveg nógu mikið hrós frá stuðningsmönnum Liverpool,“ sagði Carragher.

,,Auðvitað hefur hann farið aðeins niður á við miðað við fyrsta tímabilið, hann var aldrei að fara að skora önnur 47 mörk.“

,,Það er ekki séns að Liverpool stuðningsmenn myndu selja Alisson eða Virgil van Dijk en ef þú býður 130 milljónir í Salah þá hugsarðu um það. Þess vegna segi ég að hann sé ekki alveg í nógu miklum metum hjá þeim.“