Hörður Snævar Jónsson skrifar frá Tirana:
Íslenska landsliðið kom til Albaníu í gær, vel fór um íslenska landsliðið í fluginu. Beint flug til Tirana frá Keflavík, með Icelandair.
Íslenska liðið mætir heimamönnum á morgun í undankeppni EM, erfitt verkefni en sigur er það eina sem er í boði. Baráttan á toppi riðilsins er hörð en Tyrkir og Frakkar hafa 12 stig líkt og Ísland.
Frægasta ferð Ísland til Albaníu átti sér stað árið 2013 þegar Aron Einar Gunnarsson stal sviðsljosinu. Í viðtali við Fótbolta.net, talaði hann um að Albanir væru mestmegnis glæpamenn. Ummælin vöktu athygli.
Það var hins vegar RÚV og Geir Þorsteinsson, þá formaður KSÍ sem bjuggu til lætin. Albanir kipptu sér ekki upp við ummælin, þeir voru ekki sáttir en bjuggu ekki til nein læti. Þeir skildu að fyrirliði Íslands, hafði misst þetta út úr sér.
RÚV fór mikinn eftir ummæli Arons og Geir hótaði að taka fyrirliðabandið af Aroni, degi fyrir leikinn sem Ísland vann svo. „Ég lærði mikið á þeim tíma, maður var ungur og var svolítið flippaður í viðtölum. Við vorum að tala um þegar við lentum, þá sáum við mann sem var ber að ofan með haglabyssu á bakinu. Þá sagði ég hvort þetta væri ekki mestmegnis glæpamenn,“ sagði Aron við Auðunn Blöndal í Atvinnumönnunum okkar, um málið.
„Sem fyrirliði landsliðsins að kalla heila þjóð mestmegnis glæpamenn var skandall. Ég gerði mér grein fyrir því strax.“
Aron var ekki sáttur við Geir þegar hann hótaði að taka fyrirliðabandið af honum. „Ég tók því náttúrulega illa en ég hefði alltaf spilað. Ég er stoltur Íslendingur og var ákveðinn í að bæta upp fyrir það sem ég sagði. Ég spilaði svo minn besta landsleik úti í Albaníu,“ sagði Aron.