Rúnar Kristinsson, þjálfari KR, var sáttur með sína menn í kvöld eftir góðan 2-0 heimasigur á ÍA.

KR er nú með tíu stiga forskot á toppnum þegar aðeins þrjár umferðir eru eftir en Breiðablik spilar þessa stundina við Fylki og ef þeir grænu tapa þá fer titillinn í Vesturbæinn.

,,Ég hefði óskað þess að við hefðum skorað annað markið aðeins fyrr í leiknum, það var komin pressa á okkur frá Skagamönnum en aðallega eftir langa bolta,“ sagði Rúnar.

,,Við leystum það vel og svo klárum við þetta vel með frábæru marki frá Kidda. Það er ákveðinn léttir að komast í 2-0, það er betra en að vera í 1-0 því það getur alltaf eitthvað gerst þegar menn eru að lúðra boltanum á milli vítateiga.“

Rúnar neitar að KR sé komið með níu fingur á titilinn og ætlar ekki að horfa á leik Breiðabliks og Fylkis í kvöld.

,,Ég vil ekki segja það, við þurfum ennþá þrjú stig og eigum þrjá erfiða leiki við lið sem allir spáðu topp þrem í sumar. Við bíðum og sjáum hvernig úrslitin fara í kvöld.“

,,Ætli ég fari ekki bara út á golfvöll og slái nokkrar. Ég næ níu, ég er svo snöggur að spila, ég nota svo fá högg!“