Það vakti athygli þegar Gary Martin, strákurinn frá Darlington á Englandi framlengdi samning sinn við ÍBV í vikunni. Þetta gerði Gary nokkrum dögum eftir að ÍBV féll úr Pepsi Max-deild karla.

Gary kom til ÍBV um mitt tímabil, honum tókst ekki að bjarga liðinu en hefur skorað fjögur mörk í átta leikjum. Enski framherjinn hefur sannað ágæti sitt hér á landi.

Enski framherjinn hefur mikið verið í fréttum í sumar, sérstaklega í upphafi þegar Valur rifti samning við hann eftir þrjá leiki. Rætt var um tíðindin í Steve dagskrá, hinum vinsæla hlaðvarpsþætti.

,,Gary Martin skorar og skrifaði undir aftur, það var bara mynd af honum og Daníel Geir Moritz,“ sagði Vilhjálmur Freyr Hallsson, annar af stjórnendum þáttarins.

Andri Geir sagði að Daníel Geir, sem er formaður knattspyrnuráðs hjá ÍBV byrji með látum í starfi. ,,Hann er byrjaður að láta að sér kveða, signar Gary Martin áfram.“

Vilhjálmur velti því fyrir sér hvort tekjurnar sem Gary fái í Eyjum séu ekki góðar.

,,Heldur þú að hann sé ekki á ágætis tekjum þarna? Svo er hann bara living the good life af Vals peningunum. Ég held að það gæti verið,“ sagði Vilhjálmur en Valur greiddi Gary Martin til að yfirgefa félagið.