Það fór fram hörkuleikur í 3.deild karla um helgina er lið Augnabliks og Einherja áttust við á Vopnafirði.
Leiknum lauk með 1-1 jafntefli en Todor Hristov kom Einherja yfir áður en Nökkvi Egilsson tryggði Augnabliki stig.
Í hlaðvarpsþættinum Dr. Football var sögð ansi skemmtileg saga af leik helgarinnar eða af því sem gerðist eftir leik.
Sérfræðingurinn Kristján Óli Sigurðsson sagði þessa sögu í þættinum en við hlið hans sátu Hjörvar Hafliðason og Hrafnkell Freyr Ágústsson.
,,Ég verð að koma með eina sögu tengda þessum leik. Todorinn setti eitt mark á sjöundu mínútu og þeir voru nú ekkert það pirraðir eftir leik, Einherjamenn að þeir hafi ekki náð þrem punktum,“ sagði Kristján.
,,Hann vinnur í ríkinu á Vopnafirði og þar er bara opið á milli 10 og 12 á laugardögum en hann náði bara í lyklana fyrir Augnabliks-strákana svo þeir gætu fengið sér 2-3 kalda á leiðinni heim!“
Það var einmitt Hrafnkell sem tók á móti lyklunum en hann er leikmaður Augnabliks og tók þátt í verkefni helgarinnar.
,,Hann náði í lyklana fyrir mig. Þetta er algjör toppmaður. Við borguðum bara með seðlum,“ sagði Hrafnkell.
,,Ég addaði honum á Facebook eftir þetta og er að spá í að fara bara að spjalla við hann. Þetta er það mikill meistari.“
