Gareth Bale, leikmaður Real Madrid, hefur sterklega verið orðaður við brottför undanfarnar vikur.
Bale mun líklega ekki eiga fast sæti í liði Real á næstu leiktíð en Zinedine Zidane er orðinn þjálfari liðsins á ný.
Zidane er ekki mikill aðdáandi Bale og mun vængmaðurinn þurfa að sætta sig við bekkjarsetu á næstu leiktíð.
Stuðningsmenn Real vilja þá ekki sjá Bale en hann fékk mikið skítkast er snúið var aftur til æfinga í gær.
Leikmenn Real mættu til æfinga á ný eftir sumarfrí og fékk Bale svo sannarlega að heyra það fyrir utan heimavöll liðsins.
AS greinir frá því að klappað hafi verið fyrir flest öllum leikmönnum en Bale fékk hins vegar ekki góðar móttökur.
Bale hefur spilað með Real frá árinu 2013 en hann ku vera sáttur á Spáni og með þau laun sem hann fær í hverri viku.
Stuðningsmenn vilja meina að Bale sé óþakklátur og að hann sýni félaginu litla sem enga virðingu.