Şenol Güneş, þjálfari Tyrklands er brjálaður yfir því hvernig komið var fram við hann og leikmenn sína á Keflavíkurflugvelli í gær. Hann segir Íslendinga hafa litlar sálir og að svona eigi ekki að haga sér.

Tyrkir komu til landsins í gær, fyrir landsleik gegn Íslandi sem fram fer á morgun. Tyrkir voru í 80 mínútur í öryggisleit. Þeir voru ósáttir með það, Isavia kveðst hafa farið eftir reglum. Tyrkland flaug frá Konya sem er ekki alþjóðaflugvöllur. Sökum þess var eftirlitið meira.

,,Er einhver hérna sem er eldri en 43 ára? Við sjáum fótboltann sem hlut til að sameina fólk, sama hvaða trú eða þjóðerni þú hefur. Íslendingar fengu jákvæð viðbrögð eftir EM og HM, ég kom hingað árið 1976. Völlurinn er eins en borgin hefur breyst,“ sagði Gunes sem var mjög heitt í hamsi í ræðu, sem hann hafði undirbúið.

,,Ég kom í köldum september árið 1976 en fólkið var hlýtt. Núna er Kári Árnason í Tyrklandi og fleiri leikmenn hafa spilað þar, ætlum við að tala um það sem tveir öryggisverðir gerðu í gær? Ég hef verið í fótbolta í 53 ár, þegar þú ferð í svona eftirilit þá áttu ekki von á svona. Af hverju var verð að hrista vegabréfið mitt?,“ sagði Senul og hristi bréfið til að leika eftir, það sem öryggisvörðurinn á Keflavíkurflugvelli á að hafa gert.

,,Hvað var að vegabréfinu mínu? Þeir tóku snyrtivörur, vökva og síma. Hvað voru þeir að reyna að gera? Ísland er lítið land en með því að haga sér svona ertu að gera lítið úr sjálfum þér, þetta er utan vallar. Ég er að útskýra mál mitt.“

Gunes talaði svo um Aron Einar Gunnarsson, sem sagði í dag að hann hefði upplifað svipaða hluti þegar Ísland fór til Konya árið 2015.

,,Aron Einar sagði að þeir hefðu upplifað sömu hluti í Konya, það er líka rangt. Ef þessi meðferð kom vegna þess að svona var tekið á móti þeim í Konya, þá er það mjög rangt viðhorf. Við erum stór þjóð og högum okkur ekki svona, núna loka ég málinu. Flug í sex og hálfan tíma og svo bíða í tvo tíma á vellinum.“

,,Ég vildi ekki ræða þetta en Ísland fékk tvo heimaleiki í sumar, þeir fengu forskot og þurfa ekki að gera svona.“

,,Kannski ætti UEFA að taka á málinu, laga hlutina. Þeir eiga að taka á málinu.“