Einar Þór Sigurðsson skrifar frá Moldóvu:
,,Þetta var erfiður leikur gegn Tyrkjum og ég býst við erfiðum leik á morgun. Þetta verður öðruvísi leikir,“ sagði Erik Hamren, landsliðsþjálfari Íslands á fréttamannafundi í Moldóvu í dag. Íslenska liðið kom til landsins í gær.
Síðasti leikurinn í undankeppni EM er á morgun, leikurinn er aðeins upp á stoltið. Bæði Tyrkland og Frakkland eru komin áfram í riðlinum. Ísland fer í umspil í mars og Moldóva hefur þrjú stig, krafa er gerð á að íslenska liðið vinni.
,,Við munum hafa boltann meira en gegn Tyrkjum en þetta verður erfiður leikur. Moldóva stóð sig vel gegn Frakklandi, úrslitin sýna það. Frakkarnir fengu erfiðan leik þar. Ég hlakka til að sjá leikinn á morgun. Við viljum enda þessa undankeppni vel og vinna.“
Alfreð Finnbogason, fór úr axlarlið gegn Tyrklandi en aðrir eru heilir heilsu. Búist er við að Hamren geri talsverðar breytingar á liðinu, sökum þess að leikurinn skiptir litlu máli
,,Alfreð er meiddur. Leikmenn stífir og svona. En ég hef talað við leikmenn og þeim líður vel. En við sjáum til eftir æfingu í dag.“
