Einar Þór Sigurðsson skrifar frá Istanbúl:
„Þetta er frábært tækifæri fyrir okkur að tryggja okkur inn í lokakeppni EM en þetta er ekki búið,“ sagði Cengiz Ünder, leikmaður Roma og tyrkneska landsliðsins, á blaðamannafundi Tyrkja í gærkvöldi vegna leiksins við Ísland í kvöld.
Ünder, sem er einn besti leikmaður Tyrkja, kvaðst meðvitaður um að íslenska liðið væri hættulegt og gæti auðveldlega refsað því tyrkneska. „Við þurfum að sýna þolinmæði og halda okkur við okkar kerfi allt til leiksloka. Ísland á engra annarra kosta völ en að vinna sem gerir verkefnið þeim mun meira krefjandi fyrir okkur. Ef við missum einbeitinguna í augnablik getur Ísland refsað okkur.“
Í fréttum tyrkneskra fjölmiðla kemur fram að rauðar treyjur verði í sætum á Turk Telekom-vellinum í Istanbúl í kvöld. Þá verður tyrkneskum fánum dreift til áhorfenda. Uppselt er fyrir löngu á leikinn en völlurinn tekur rúmlega 52 þúsund áhorfendur í sæti.
