Sagt var frá því í Expressen að leikmaður í sænsku deildinni hafi verið handtekinn í Stokkhólmi í vikunni. Samkvæmt heimildum Fréttablaðsins er um að ræða Kolbein Sigþórsson, landsliðsframherja Íslands.
Í frétt Expressen kemur fram að leikmaðurinn hafi á miðvikudag verið handtekinn. Hann hafi verið ölvaður og átt í deilum við dyravörð í Stokkhólmi. Um er að ræða Kolbein Sigþórsson, hinn 29 ára gamla landsliðsmann í knattspyrnu.
Sagt er að Kolbeinn hafi verið lengi fram eftir á næturlífinu og veitt mótspyrnu við handtöku. Hann var handtekinn klukann 03:00 samkvæmt frétt Expressen. Kolbeinn var settur í fangageymslu en AIK, lið Kolbeins neitar að tjá sig.
,,Að fara út á lífið á þennan hátt er ekki samkvæmt okkar reglum,“ sagði talsmaður AIK, hann sagði að málið yrði tæklað innanhús.
Expressen segir á vef sínum að félagið hafi ítrekað reynt að ná í leikmanninn, í síma og í gegnum félag hans, AIK. Framherjinn er á sínu fyrsta ári hjá AIK. Hann jafnaði markamet íslenska landsliðsins á dögunum þegar hann skoraði sitt 26 mark í sigri á Andorra, hann og Eiður Smári Guðjohnsen deila metinu.
Framherjinn hafði upplifað erfiða tíma innan vallar í rúm tvö ár, þegar AIK fékk hann. Hann var hjá franska liðinu Nantes áður, þar var þessi knái leikmaður mikið meiddur. Hjá AIK hefur hann verið að byggja sig upp á nýjan leik og hefur reynst íslenska landsliðinu, afar vel.