Einar Orri Einarsson og Magnús Þórir Matthíasson, hafa framlengt samninga sína við Kórdrengi um eitt ár, liðið leikur í 2. deildinni næsta sumar.
Báðir voru lykilmenn þegar Kórdrengir unnu 3. deildina í sumar Þetta lið sem er aðeins þriggja ára í deildarkeppni á Íslandi, hefur farið upp um tvær deildir á tveimur árum.
Einar og Magnús ólust báðir upp í Keflavík og léku lengi vel með liðinu í efstu deild, Kórdrengir eru stórhuga og vilja halda áfram að klifra upp um deildir.
,,Þetta var stærra skref fyrir mig í fyrra að fara þá í 3 deildina, eftir að við tryggðum okkur upp í sumar var alltaf áhugi hjá mér að vera áfram,“ sagði Einar Orri í samtali við 433.is eftir að hafa krotað undir nýjan samning. Leikmaður sem lið í efstu tveimur deildunum höfðu áhuga á.
Kórdrengir hafa gert vel síðustu ár og Einar er hrifinn af metnaði þeirra sem stjórna. ,,Ég kom inn í þetta á síðasta ári og þá var stefnan sett á að fara beint upp úr 3. deildinni. Núna erum við komnir í 2. deildina og þegar við vorum að skoða og ræða framhaldið, þá er stefnan sett á að fara beint upp úr 2. deildinni.“
Einar segir vel að öllu staðið hjá Kórdrengjum. ,,Allt í kringum klúbbinn er mjög gott, þetta sumar sem nú er á enda er eitt af mínum skemmtilegustu.“
Kórdrengir ætla að styrkja lið sitt fyrir komandi átök en bæði Guðjón Orri Sigurjónsson og Albert Brynjar Ingason hafa verið orðaðir við félagið.