Burnley er það lið í enska boltanum sem spilar boltanum minnst á milli sín, liðið er með einstakan leikstíl sem Sky Sports fer ítarlega yfir.

Burnley spilar gamaldags fótbolta en það virkar, liðið er á sínu fjórða tímabili í ensku úrvalsdeildinni í röð. Jóhann Berg Guðmundsson hefur verið lykilmaður í liðinu öll þau ár.

,,Í dag ertu dæmdur ef þú gerir ekki eins og hinir. Mér er alveg sama, af hverju eiga fótboltalið að spila bara á einn hátt? Það er ekki þannig, það eiga ekki allir að gera það sama,“ sagði Sean Dyche stjóri Burnley.

Sendingar á milli manna:

Burnley er það lið sem hefur sjaldnast sent boltann tíu sinnum á milli sín, aðeins tuttugu sinnum frá því að tímabilið hófst. Það er í átta leikjum, ótrúlega lítið.

Fá ekki hraðar sóknir á sig:

Burnley er það lið sem fær fæstar skyndisóknir á sig, liðið opnar sig sjaldan og er með marga til baka til að fá ekki á sig færi. Dyche tekur ekki neina sénsa.

Langar sendingar:

Tæp 24 prósent af sendingum Burnley eru langar, það er ekkert lið í ensku úrvalsdeildinni sem sparkar boltanum jafn langt. Þessi leikstíll hentar Burnley vel en liðið er með 12 stig, í sjöunda sæti.