Christian Eriksen, leikmaður Tottenham, þurfti að svara fyrir sig á samskiptamiðlinum Twitter í gær. Eriksen lék með Tottenham í 7-2 tapi gegn Bayern Munchen í fyrradag en leikið var í Meistaradeildinni.

Í kjölfarið fóru sögusagnir af stað um Eriksen og liðsfélaga hans Jan Vertonghen. Talað var um að Vertonghen hefði sofið hjá eiginkonu Eriksen og að þeir hafi rifist heiftarlega í búningsklefanum.

Einnig var greint frá því að Eriksen hafi reynt ítrekað að komast burt í sumar vegna þess. ,,Kjaftæði,“ skrifaði Eriksen á Twitter-síðu sína í gær áður en Vertonghen blandaði sér í málið og sagði sömu sögu.

Eriksen þarf þó að taka á sig eitt, það er að hafa gefið Vertonghen glóðarauga á æfingu Tottenham.

Ensk blöð segja frá því að þeir hafi skollið saman á æfingu og Vertonghen farið illa úr því, allar sögur um framhjáhald eru hins vegar tóm steypa.