Stjarnan ætlar að reyna allt til að fá markvörðinn Ingvar Jónsson fyrir næsta tímabil í efstu deild.

Frá þessu greinir sérfræðingurinn Kristján Óli Sigurðsson sem er hluti af hlaðvarpsþættinum Dr. Football.

Kristján ræddi við kollega sína Hjörvar Hafliðason og Mikael Nikulásson í dag og nefndi tvo leikmenn sem Stjarnan ætlar að reyna að fá.

Einn af þeim er Cedric D’Ulivo, bakvörður FH og hinn er Ingvar sem varði áður mark liðsins.

Ingvar hefur undanfarin fjögur ár spilað erlendis og ver í dag mark Viborg í Danmörku.

,,Það er annar maður á leiðinni sem þekkir það að taka málma og lyfta þeim. Þeir ætla að gera allt sem þeir geta til að tryggja sér þjónustu hans,“ sagði Kristján.

,,Það er besti leikmaður Íslandsmótsins árið 2014, Ingvar Jónsson. Þeir ætla að fá sér hann í rammann. Það er stórt. Hann er alvöru markmaður og á frábærum aldri.“