Jón Daði Böðvarsso byrjaði hjá íslenska landsliðinu í gær er liðið vann 2-1 sigur á Tyrkjum.

Jón hefur verið mikið meiddur síðustu mánuði en kom sterkur inn í liðið í gær og stóð sig með prýði.

,,Það er ógeðslega langt síðan ég spilaði síðast, það var í febrúar. Maður saknaði þess að snerta fótbolta og vera á grasinu,“ sagði Jón Daði.

,,Maður rennur svolítið á adrenalínu og stemningunni á tíðum. Ég var orðinn svolítið þreyttur á 60. mínútu en hefði getað þjösnast í gegnum 90.“

,,Það er æðislegt að fá sigur og sex stig úr þessum leikjum.“

,,Mér hefur gengið vel á æfingum og fitnessið er tip top þannig séð. Ég fór á Selfoss um leið og tímabilinu lauk og æfði þar með Gunnari Borgþórssyni. Maður verður að gefa honum shout out og þakka honum fyrir.“

Þjálfari tyrknenska landsliðsins neitaði að taka í höndina á Jóni Daða eftir leikinn. Jón greindi frá þessu er hann var spurður út í það hvort hann hefði fengið hatursskilaboð á samskiptamiðlum eftir vesen í kringum tyrknenska liðið í gær.

,,Ég fékk helling af þessu. Ég nennti ekki að horfa á þetta eða skoða þetta. Mér finnst þeir gera alltof mikið úr þessu og svo var þessi maður ekki einu sinni Íslendingur með þennan blessaða bursta. Ég reyndi að taka í höndina á þjálfaranum en hann neitaði því eftir leik.“