Valur reynir að semja við Gary Martin um starfsflok við félagið. Fótbolti.net segir frá.

Gary hefur ekki fengið að æfa með Val frá því að 433.is greindi frá því að félagið vildi losna við hann.

Tíðindin koma talsvert á óvart því ekki eru nema rúmir fjórir mánuðir síðan að Valur setti allt sitt traust á breska framherjann. ,,Ég er búinn að tilkynna honum að hann megi finna sér nýtt félag, Gary er fínn drengur og búinn að standa sig vel. Hann hentar ekki okkar leikstíl,“ sagði Ólafur Jóhannesson þjálfari Vals í samtali við 433.is.

Þetta er í eina skiptið sem Ólafur hefur tjáð sig um málið, síðan þá hefur hann ekki viljað ræða það.

Gary er með samning við Val til ársloka 2021, það gæti því reynst dýrt fyrir Val að semja um starfslok við hann. Samningurinn er langur og ljóst er að Gary er einn launahæsti leikmaður deildarinnar.

Ekki er víst að Gary taki það í mál, enda ekki með neitt annað í hendi.

Félagaskiptaglugginn er lokaður og opnar ekki fyrr en í júlí, þá er möguleiki á að Gary geti fundið sér nýtt lið. Gary hafði skorað tvö mörk í þremur deildarleikjum þegar allt fór í steik.