Wilfried Zaha, leikmaður Crystal Palace, hefur tjáð sig um erfiða tíma er hann spilaði með Manchester United.

Zaha var fenginn til United árið 2013 frá Crystal Palace en hann var gríðarlegt efni á þessum tíma.

Þar lék vængmaðurinn í tvö ár en spilaði aðeins fjóra leiki í öllum keppnum og var fljótlega sendur aftur til Palace á láni.

Hann samdi svo endanlega við Palace á ný árið 2015 og er nú orðaður við stórlið Evrópu.

David Moyes vildi ekki gefa Zaha tækifæri eftir að hafa tekið við og ákvað hann að lokum að leita annað.

,,Þetta var tækifæri lífsins. Að fá tækifæri að spila fyrir Manchester United,“ sagði Zaha.

,,Þetta var stærra en allt sem ég gat vonast eftir og ég horfði á þetta þannig. Ég gerði mitt besta á æfingum til að sýna hvað ég gæti gert.“

,,Svo ákvað hann að taka mig úr Meistaradeildarhópnum og setti Adnan Januazaj inn, sem hafði aldrei spilað fyrir aðalliðið.“

,,Það var þá sem ég vissi að vandamálin voru mun stærri en ég hélt, þetta snerist ekki lengur um fótbolta.“

,,Þegar þetta snerist ekki um fótbolta eða getu, hvað annað gat ég gert?“

,,Að fá engin tækifæri til að spila og svo segir fólk að ég hafi verið mistök, það særir mig mest. Hvernig getur það verið rétt þegar ég fæ ekki tækifæri?“

,,Á hverjum degi langaði mig að opna Twitter eða Instagram og segja eitthvað en ég gat það ekki. Það væri ófagmannlegt.“