Lengi hefur súkkulaði verið talið til eins þeirra þátta sem orsaka þyngdaraukningu og offitu en nú segja vísindamenn að súkkulaði geti gagnast í að koma í veg fyrir offitu og sykursýki 2. Þetta eru auðvitað frábærar fréttir fyrir alla aðdáendur súkkulaðis.

Niðurstöður rannsóknar sýna að í kakói er andoxunarefni sem getur komið í veg fyrir þyngdaraukningu og lækkað magn blóðsykurs í líkamanum. Vísindamennirnir sem gerður rannsóknina segja að einnig séu vísbendingar um að neysla á dökku súkkulaði geti eflt heilastarfsemina, dregið úr matarlyst og lækkað blóðsykurinn.

Niðurstöður rannsóknarinnar voru birtar í The Journal of Agricultural and Food Chemistry og þar kemur fram að andoxunarefni í kakói hafi komið í veg fyrir þyngdaraukningu hjá músum og hafi lækkað blóðsykurmagnið.

Dr. Andrew Neilson og aðrir sem gerðu rannsóknina segja að þetta sé vegna þess að kakó, sem er eitt af grunnefnunum í súkkulaði, innihaldi mikið magn af flavonóíði því það er andoxunarefni og hefur sýnt sig að gagnist í baráttu við offitu og sykursýki 2.

Flavonóíð er til í mörgum útgáfum og eru þær mishollar og margar útgáfur af því er að finna í kakói. Vísindamennirnir reyndu því að finna út hver áhrif hinna mismunandi útgáfa væru. Mýs voru því látnar prufa margvíslegt mataræði, allt frá mjög fituríku til fitulítils og fituríkt með viðbættum ýmsum tegundum af flavonóíði. Í ljós kom að ein tegund andoxunarefnisins, oligomeric procyanidins, var góð viðbót við mataræðið og skilaði mestum árangri í að halda aftur af þyngdaraukningu ef mýsnar voru á mjög fituríku mataræði. Efnið bætti einnig þol músanna gegn glúkósa sem getur hugsanlega gagnast í að koma í veg fyrir sykursýki 2.

Daily Mail segir að vísindamennirnir hafi sagt að oligomeric procyanidins virðist gagnast best af öllum þeim flavonóíðum sem eru í kakói.

Nokkrum dögum áður en niðurstöður þessarar rannsóknar voru birtar var skýrt frá niðurstöðum vísindamanna við Louisiana State University um að dökkt súkkulaði geti minnkað blóðþrýsting og bætt ástand hjartans.