Það var nóg um að vera hjá lögreglunni á höfuðborgarsvæðinu í nótt en alls komu 78 mál inn á borð lögreglu á 12 klukkustundum, frá klukkan sjö í gærkvöld til klukkan sjö í morgun.
Tveir menn voru yfirbugaðir með piparúða og handteknir á Nýbýlavegi um hálf tvö í nótt eftir að lögreglumenn veittu vopni athygli í bíl þeirra. Mennirnir réðust að lögreglu þannig að áverkar hlutust af, að því er fram kemur í yfirliti lögreglu. Þeir gista nú fangageymslur.
Eins og áður segir voru verkefni lögreglunnar mörg í nótt en um tíuleytið í gærkvöld var maður handtekinn fyrir að sýna af sér ósæmilega hegðun. Að sögn lögreglu gistir hann fangageymslu þar til hægt verður að ræða við hann.
Þá var lögreglan kölluð til um þrjúleytið í nótt vegna þess að fólk hafði brotist inn í Kópavogslaug.