Síðastliðinn desember tilkynnti lögreglan á sérstökum blaðamannafundi að fimm hafi verið handteknir hér á landi í tengslum við rannsókn á umfangsmiklu fíkniefnamáli sem teygir anga sína til nokkurra landa; Íslands, Hollands og Póllands. Málið hefur verið kennt við verslunina Euro Market þar einn hinna handteknu er eigandi kjörbúðarinnar.
Fréttablaðið greinir frá því að lögregla hafi afhent pólskum fjölmiðlum myndband af húsleit á heimili mannsins í desember. Lögregluaðgerðin átti sér stað á heimili mannsins í Kópavogi. Lögmaður mannsins, Steinbergur Finnbogason, fullyrðir að það hafi verið gert í bága við íslensk lög. Á myndbandinu má sjá vopn og peninga haldlagða.
Í desember sagði Grímur Grímsson, þáverandi yfirlögregluþjónn, að rannsóknin snúi að innflutningi á amfetamínbasa. Úr honum hafi verið hægt að framleiða 50 til 80 kíló af amfetamíni. Þá hefði einnig verið um að ræða MDMA sem hægt hefði verið að framleiða 26 þúsund töflur úr.
Fréttablaðið greinir frá því að málið sé enn til rannsóknar og er haft eftir Margeiri Sveinssyni, yfirmanni miðlægrar deildar lögreglunnar, að rannsókn beinist að fíkniefnainnflutningi og peningaþvætti, fjársvikum, brotum á vopnalögum, lyfjalögum og fíkniefnaframleiðslu.
