Héraðsdómur Reykjavíkur sýknaði í gær tryggingafélagið Sjóvá – Almennar af kröfu konu sem sem þurfti að sjá á eftir bíl sínum í eldsvoða. Atvikið átti sér stað fyrir tveimur árum og æxlaðist þannig að eldurinn kom upp í öðrum bíl sem staðsettur var við hliðina á bíl konunnar.

Eigandi bílsins, sem eldurinn kom upp í, var tryggður hjá Sjóvá-Almennum sem taldi sig ekki þurfa að bæta tjónið sökum þess að bílinn var ekki í notkun þegar atvikið átti sér stað.

Fyrir dómi benti konan á að eldurinn hefði kviknað vegna bilunar í rafbúnaði hins bílsins sem ætti því að tengjast notkun hans. Á móti benti tryggingafélagið á að bíllinn hefði staðið ónotaður í tæpan sólarhring áður en atvikið varð. Í rannsókn lögreglu um málið kemur fram að eldurinn hafi líklega kviknað vegna bilunar í rafbúnaði bílsins.

Í niðurstöðu dómsins kemur fram að Dómarinn kemst því að þeirri niðurstöðu að ekki hafi tekist að sýna fram á hvernig notkun á hinum bílnum hafi orðið til þess að eldur barst í bíl konunnar.