Framkvæmdastjóri fékk glænýjan 4,7 milljóna króna bíl til afnota – 300 metrar frá heimili til skrifstofu
„Þann tíma sem ég starfaði í Krýsuvík þá skildi ekki nokkur maður í bílakaupum samtakanna. Það var sífellt verið að fjárfesta í einhverjum druslum sem dugðu aðeins í skamman tíma. Það sama gilti ekki um yfirstjórnendurna. Ég upplifði þetta sem gegndarlaust bílabrask,“ segir fyrrverandi starfsmaður meðferðarheimilisins í Krýsuvík í samtali við DV. Þann tíma sem viðkomandi starfaði á meðferðarheimilinu segir hann að starfsmenn hafi verið ósáttir við þá staðreynd að gamlar druslur voru keyptar til þess að ferja starfsmenn og skjólstæðinga til og frá Krýsuvík á meðan yfirstjórnendurnir, mæðginin Lovísa Christiansen, framkvæmdastjóri Krýsuvíkursamtakanna, og Þorgeir Ólason, forstöðumaður meðferðarheimilisins, hafi fjárfest í mun veglegri ökutækjum til eigin afnota. Þá kemur margt einkennilegt í ljós þegar bílaviðskipti samtakanna eru skoðuð. Meðal annars hefur Þorgeir bæði keypt og selt samtökunum bíla og þá fékk 18 ára barnabarn Lovísu bíl sem áður var í eigu samtakanna.
Í síðust viku greindi DV frá því að Lovísa Christiansen, framkvæmdastjóri Krýsuvíkursamtakanna, hefði fjárfest í splunkunýrri Dodge Ram-bifreið handa syni sínum, Þorgeiri Ólasyni, forstöðumanni samtakanna. Bifreiðin kostaði tæpar 10 milljónir króna þegar allt var tekið með í reikninginn. Þegar DV spurðist fyrir um kaupin og hvort þau væru eðlileg þá var bíllinn þegar í stað auglýstur til sölu á bílasölu. Útskýring samtakanna á þeirri ákvörðun var á þá leið að við nánari athugun hafi bíllinn verið of dýr fyrir samtökin.
Þegar DV spurði út í bílakaup samtakanna sagði stjórnarformaður Krýsuvíkursamtakanna, Sigurlína Davíðsdóttir, að stjórnin hefði ekki verið með fingurna í bílaumsvifum stofnunarinnar. Hún hafi þó verið upplýst um þau umsvif þegar eftir því var óskað.
Ýmislegt athyglisvert kemur í ljós þegar bílaviðskipti Krýsuvíkursamtakanna eru skoðuð. Þannig fjárfesti Lovísa í glænýrri Skoda Octavia-bifreið fyrir sjálfa sig í nóvember 2012. Kaupverðið var 4,7 milljónir króna. Það verður að teljast einkennileg ráðstöfun á meðferðarheimili, sem að sögn forsvarsmanna nær varla endum saman. Sérstaklega í ljósi þess að skrifstofa Krýsuvíkursamtakanna, þar sem Lovísa starfar dagsdaglega, er 300 metrum frá heimili hennar í Hafnarfirði. Samkvæmt heimildum DV á hún afar sjaldan erindi á meðferðarheimilið sjálft í Krýsuvík.
Þá hafa ýmisleg einkennileg viðskipti átt sér stað. Til dæmis keypti títtnefndur Þorgeir Ólason Dodge Ram 250 af Krýsuvíkursamtökunum í júní árið 2001 en þá höfðu samtökin haft afnot af bifreiðinni í þrjú ár. Þorgeir átti bifreiðina í tæp átta ár áður en hann seldi hana áfram í byrjun árs 2008. Þá keypti hann einnig Chevrolet-bifreið af samtökunum um mitt ár 2004 en áframseldi hana síðan nokkrum mánuðum síðar. Þá keypti meðferðarheimilið dráttarvél af Þorgeiri í desember 2005 en þá hafði hann eingöngu átt vélina í rúma þrjá mánuði. Þá eignaðist barnabarn Lovísu forláta Suzuki Vitara-bifreið sem var áður í eigu samtakanna. Samkvæmt heimildum DV var sá gjörningur sagður vera laun til piltsins sem þá var 18 ára gamall.