Nærri þrír af hverjum fjórum Íslendingum, eða 71%, er með aðildarkort í Costco. Þetta kemur fram í niðurstöðum nýrrar könnunar MMR.
Af þeim sem eru með aðildarkort í Costco ætla 60% að endurnýja aðildina þegar hún rennur út, 6% ætla ekki að endurnýja en heil 35% hafa ekki ákveðið sig.
Íslendingar sem tilheyra aldurshópnum 30-49 ára eru líklegri en aðrir aldurshópar til að vera með Costco aðildarkort eða 80%, samanborið við 58% í aldurshópnum 18-29 ára. Íslendingar í aldurshópnum 30-49 ára eru jafnframt líklegri en aðrir til að endurnýja aðildina.
Athygli vekur að hlutfall karla og kvenna með Costco aðildarkort er hnífjafnt eða 71%. Eilítið fleiri karlar en konur hyggjast þó endurnýja aðildina, eða 61% á móti 59%.
Töluvert fleiri íbúar Höfuðborgasvæðisins er með aðild að Costco, eða 77%, en íbúar landsbyggðarinnar, 60%. Hlutfall þeirra sem ætla að endurnýja aðildina er þó nokkuð jafnt eða 60% íbúa Höfuðborgarsvæðisins og 59% íbúa landsbyggðarinnar.
Stuðningsfólk Miðflokksins, 81%, reyndist líklegast til að vera með Costco aðildarkort en stuðningsfólk Framsóknarflokks, 59%, og Vinstri grænna, 60%. Jafnframt er stuðningsfólk Framsóknarflokksins, 47%, og Vinstri grænna, 54%, ólíklegra en stuðningsfólk annarra flokka til að endurnýja aðildina.
Fólk með tekjur á milli 800 þúsund og 999 þúsund á mánuði er líklegast til að vera með aðildarkort í Costco, eða 83%, en aðeins 49% þeirra sem eru með undir 250 þúsund á mánuði. Könnunin var gerð dagana 25. til 30. janúar 2018. 928 einstaklingar svöruðu.