Margrét Friðriksdóttir, frumkvöðlafræðingur birti í dag færslu í spjallhópnum Stjórnmálaspjallið á Facebook þar sem hún segir að ástæðan fyrir því að flóðbylgjan sem lenti á strönd Indónesíu í gær hafi verið vegna þess að guð sé reiður. Yfirvöld þar í landi telja að yfir 220 manns séu látnir og yfir 800 manns eru slasaðir eftir flóðbylgjuna. Skall flóðbylgjan á eftir að eldgos átti sér stað í Anak Krakatau-eldfjallinu, sem liggur mitt á milli eyjanna Súmötru og Java í Indónesíu.

Margrét segir í færslunni: „Flóðbylgja enn á ný yfir jólahátíðina (Christmas) og menn vilja halda því fram að guð sé ekki reiður eða komi þessu ekkert við?“ Fyrir neðan færslu sína birtir hún svo frétt BBC um flóðbylgjuna. Í umræðum undir færslunni sagði Margrét: „Það borgar sig ekki að storka Guði eða gera lítið úr honum ;).“

Um jólin 2004 reið afar öflug flóðbylgja yfir Indlandshaf í kjölfarið á gríðaröflugum jarðskjálfta sem reið yfir neðansjávar. Um er að ræða einar mannskæðustu náttúruhamfarir sögunnar en talið er að 230 til 280 þúsund manns hafi látið lífið. Bylgjan reið yfir á öðrum degi jóla, þann 26. desember, og er Margrét eflaust að vísa til þeirra hamfara einnig.

Færsla Margrétar olli hörðum viðbrögðum, en Margrét eyddi henni stuttu seinna. Það dugði ekki því skjáskot náðist af færslu hennar og hefur meðal annars Vantrú, félag trúleysingja byrjað að auglýsa færsluna hennar Margrétar. Við færsluna skrifar Vantrú: „Jólakveðja frá fólkinu sem þykist eiga þessa hátíð.“