Drakk vatn úr pollum, sama hversu skítugt vatnið var
„Það er varla hægt að ímynda sér hversu stórt þetta svæði er. Ég hugsaði með mér að ég hlyti að rekast á einhvern, manneskju eða hús, en það var ekkert. Ekkert nema náttúran,“ segir hin tuttugu og fimm ára gamla Lisa Theris sem komst í heimsfréttirnar í vikunni.
Eins og DV greindi frá í gær fannst Lisa illa haldin og nakin á fáförnum sveitavegi í Alabama á laugardag. Þá var liðinn tæpur mánuður frá því síðast spurðist til hennar. Það var kona að nafni Judy Garner sem ók fram á Lisu.
Lisa sagði frá reynslu sinni í viðtali við WSFA-sjónvarpsstöðina í Alabama þar sem meðal annars kemur fram að hún hafi dvalið úti í óbyggðum í 25 daga. Hún drakk vatn úr þeim pollum sem hún rakst á og ef það rigndi saug hún á sér hárið til að koma vökva í líkamann. Þá borðaði hún ber og annað ætilegt sem hún rakst á.
Ekki liggur ljóst fyrir hvernig Lisa endaði úti í óbyggðum en greint var frá því í gær að tveir menn hefðu verið handteknir, tveimur vikum eftir hvarf hennar. Mennirnir, Manley Davis og Randall Oswald, voru handteknir vegna innbrota en þeir sögðu að Lisa hefði verið með þeim í bifreið þegar þeir hugðust brjótast inn í hús. Þegar Lisa frétti af fyrirætlunum þeirra hafi hún farið út úr bifreiðinni þar sem hún vildi ekki láta kenna sig við innbrot.
Þá hefur það vakið spurningar að Lisa kom fram tveimur dögum eftir að ákæra fyrir óspektir á almannafæri var felld niður. Það var gert í ljósi þess að Lisa var talin látin. Lögregla telur þó að ekki sé ástæða til að efast um það að Lisa hafi verið úti í allan þennan tíma.
„Ég gerði bara það sem ég þurfti að gera. Þegar ég var þyrst þá reyndi ég að drekka, alveg sama hversu skítugt vatnið var. Ég varð að drekka eins mikið og ég gat. Ég þakka Guði fyrir berin sem ég gekk fram á. Það var alltaf nóg af berjum.“
Lisa er nú á góðum batavegi en hún var ansi illa bitin víða á líkamanum. Að öðru leyti var hún þó við sæmilega heilsu. „Ég er bara svo fegin að vera komin heim. Ég þakka öllum fyrir bænirnar og stuðninginn. Það er frábært að vera komin úr skóginum,“ sagði Lisa sem gat ekki tjáð sig nánar um málavexti í ljósi þess að lögregla er enn að rannsaka málið.