Emmanuel Macron, Frakklandsforseti, tilkynnti á fimmtudag að Frakkar hyggist koma upp úrvinnslustöðum fyrir hælisleitendur í Norður Afríku ríkinu Líbýu í sumar.

Ferðin yfir Miðjarðarhafið til Evrópu er bæði kostnaðarsöm og hættuleg. Aðilar sem ferja fólk yfir á ólöglegan hátt eru oftar en ekki á lekum og hættulegum bátum og þúsundir hafa drukknað á leið sinni yfir hafið. Þá fylgir þessari starfsemi einnig umtalsvert smygl á varningi.

Macron segir þetta gert til þess að reyna að koma í veg fyrir að fólk taki áhættu við það að komast yfir. „Hugmyndin með stöðvunum er að koma í veg fyrir að fólk taki brjálaða áhættu þegar það á engan möguleika á að fá hæli í Evrópu. Við förum til þeirra.“

Flestir koma að landi í Ítalíu

Macron hefur sjálfur staðið fyrir friðarumleitunum í Líbýu þar sem borgarastyrjöld hefur geysað í tæp sex ár. Nýlega tókst að fá stríðsaðila að borðinu og sættast á vopnahlé. Á meðan stríð geysar í landinu er það ekki í stakk búið til að takast á við þennan straum fólks sem kemur sunnar úr álfunni.

Flestir Afríkumenn sem reyna að fá hæli í Evrópu halda út á hafið frá Líbýu. Alþjóðlega innflytjendamálastofnunin (IOM) áætlar að um 100.000 manns hafi siglt frá landinu stríðshrjáða og að minnsta kosti 2300 manns hafa drukknað á þessu ári. Flestir koma að landi í Ítalíu, sem er næst Líbýu. Til dæmis hinnar litlu eyju Lampedusa sem ræður engan veginn við strauminn. Frá Ítalíu halda svo margir til Frakklands og annarra Evrópulanda.