Sorglegur atburður á hafnaboltaleik í Flórída
Sorglegur atburður átti sér stað á hafnaboltaleik í Lakeland í Flórída um helgina þegar tveggja ára stúlka varð viðskila við foreldra sína.
Karlmaður á þessum sama leik sá að stúlkan var ein á ferð og augljóslega skelkuð, enda voru foreldrar hennar eða forráðamenn hvergi sjáanlegir. Hann reyndi að aðstoða hana við leit að foreldrum sínum en það hefði hann betur látið ógert.
Eftir að hafa gengið stuttan spöl með stúlkunni komu foreldrar hennar að þeim og er óhætt að segja að faðirinn hafi brugðist illur við. Hann réðst á manninn, veitti honum fimm eða sex hnefahögg í andlitið og lét hann heyra það. Til að gera langa sögu stutta hélt hann að maðurinn ætlaði að nema stúlkuna á brott.
„Ég sá þennan mann þar sem hann hélt í höndina á dóttur minni og gekk í átt að bílastæðinu. Hvað myndir þú gera? Mig langaði að drepa hann,“ sagði faðirinn við WFLA-fréttastofuna um málið. Lögregla var kölluð á svæðið og það var þá sem kom í ljós að maðurinn sem ráðist var á var einfaldlega að reyna að veita stúlkunni öryggi og aðstoða hana við leit að foreldrum sínum.
Vitni að atvikinu sagðist hafa séð manninn aðstoða stúlkuna og bætti við að honum hafi augljóslega verið umhugað um öryggi hennar. Hann hafi bara verið að reyna að hjálpa. Eftir að hafa rætt við manninn taldi lögregla ekki ástæða til að bregðast við og voru útskýringar mannsins, sem er sjálfur tveggja barna faðir, teknar trúanlegar. Hann var í heimsókn hjá vinahjónum, sem bæði eru lögregluþjónar, og var í hópi áhorfenda á þessum sama leik.
Þó lögregla hefði tekið skýringar mannsins trúanlegar gerði faðirinn það ekki. Brá hann á það ráð – og fleiri úr fjölskyldunni – að birta myndir af honum á samfélagsmiðlum þar sem hann var úthrópaður barnaníðingur. Fleiri upplýsingar voru birtar, til dæmis símanúmer hans, hvar heimili hans er og vinnustaður.
Góðborgarinn ákvað að leggja ekki fram kæru vegna líkamsárásarinnar. Hann segist í samtali við NBC Miami hafa yfirgefið heimili sitt um stundarsakir af ótta við einhverskonar hefndaraðgerðir.