Lögregla handtók og kærði mann á miðvikudag
Í janúar árið 1970 fór hin þriggja ára gamla Cheryl Grimmer á ströndina í Meadow í Wollongong í Ástralíu ásamt móður sinni og þremur bræðrum.
Það sem átti að verða dásamlegur dagur fyrir fjölskylduna varð að martröð þegar Cheryl hvarf sporlaust. Börnin fóru í sturtu eftir að hafa leikið sér á ströndinni en Cheryl sást aldrei koma aftur út úr stúlknaklefanum.
Ricki Grimmer, bróður Cheryl, segir við BBC að hann hafi horft á eftir systur sinni í örfáar mínútur en á meðan hafi hún horfið. Einhver nam hana á brott.
Þrátt fyrir umfangsmikla leit fannst Cheryl ekki og hefur hún raunar enn ekki fundist. Það var svo á miðvikudag að lögregla handtók mann sem grunaður er um aðild að málinu.
Umræddur maður er 63 ára og lá hann undir grun á sínum tíma, að því er ABC-fréttastofan greindi frá á föstudag. Lögregla hóf rannsókn á málinu aftur á síðasta ári og það varð til þess að þrjú vitni stigu fram sem sögðust hafa séð umræddan mann, sem þá var unglingur, á vappi fyrir utan stúlknaklefann um það leyti sem Cheryl hvarf.
Lögregla virðist viss í sinni sök því nú hefur maðurinn verið kærður fyrir mannrán og morð.