Íslendingar versla í gríð og erg á netinu – Kostuleg mistök eiga sér reglulega stað
Íslendingar hafa líklega aldrei verið duglegri að versla á netinu en undanfarið. Fjöldinn af erlendum framleiðendum og verslunum í boði er nánast yfirgengilegur, ekki síst með tilkomu vefsíðunnar Ali Express sem nýtur mikilla vinsælda. Þar leynast svo sannarlega gersemar innan um fjöldaframleitt glingur. Þá er gengi íslensku krónunnar loks orðið nokkuð hagstætt í samanburði við aðra gjaldmiðla. Ódýrari vörur þýða líka að íslenskir neytendur eru reiðubúnir að taka skjótari ákvarðanir varðandi kaup og hugsanlega taka meiri áhættu og því rifjar DV upp nokkur stórskemmtileg atvik sem hent hafa landa okkar í frumskógum alþjóðlegrar netverslunar.
„Ég mun ekki láta þetta áfall stoppa mig heldur halda leitinni áfram. Það voru ákveðin vonbrigði fyrst þegar ég opnaði kassann en síðan sprakk ég gjörsamlega úr hlátri,“ sagði Svana Lovísa Kristjánsdóttir hönnuður í samtali við DV í lok ágúst í fyrra..
Svana Lovísa hafði talið sig vera að kaupa fágætan Lego-geymsluhaus frá Room Copenhagen á endursölusíðu á netinu. Verðið fannst henni afar hagstætt eða aðeins 5.700 krónur. Það runnu á hana tvær grímur þegar hún sótti pakkann á pósthúsið nokkru síðar enda virtist stærðin ekki alveg passa. Áhyggjur hennar reyndust á rökum reistur því hausinn var í hefðbundinni Lego-stærð og var ekki mikið stærri en nöglin á litla putta hönnuðarins. Svana Lovísa sá svo sannarlega spaugilegu hliðarnar á atvikinu. „Ég er meira að segja búin að týna honum tvisvar í morgun og veit í augnablikinu ekki hvar hann er staddur á heimilinu,“ sagði hún hlæjandi við blaðamann.
Hjálmar Forni Sveinbjörnsson Poulsen kemur reglulega fram sem dragdrottning við hin ýmsu tækifæri. Til þess að gera sig kláran fyrir hvert atriði þarf Hjálmar að taka með sér mikið af alls konar dóti, til dæmis nokkur sett af kjólum, skóm og skarti. Þá eru ónefndar allar snyrtivörurnar. Til þess að gera sér lífið bærilegt þá ákvað Hjálmar að fjárfesta í voldugri neonbleikri tösku á Ali Express sem rúma átti allt hans hafurtask. Þegar taskan skilaði sér loks á pósthúsið kom í ljós að hún var í besta falli í Barbie-stærð.
Það er gömul saga og ný að fatnaður lítur yfirleitt betur út á mynd en í raunveruleikanum. Í nóvember í fyrra fjallaði DV um fatakaup Elínar Fanndal sem sá glæsilegan kjól til sölu á ótilgreindri síðu á netinu. „Það eru ekki allar ferðir til fjár á netinu. Pantaði mintugrænan að ég hélt kjól og fékk horgrænan samfesting,“ sagði Elín þegar hún deildi myndinni á Facebook og uppskar eðlilega mikil viðbrögð. Einn notandi benti henni á að hugsa út fyrir boxið til þess að bjarga málinu. „Líttu á björtu hliðarnar, grænar sokkabuxur í stíl og þá ertu komin með fínan grímubúning: Tröllið sem stal jólunum,“ sagði sá.
Þetta var í fyrsta skipti sem Elín hætti sér í að kaupa á netinu. Hún lét þó mistökin ekki hafa áhrif á sig og hefur haldið ótrauð áfram, reyndar með smá hjálp. „Ég hef verið í sambandi við reynslubolta síðan og ber undir hana allt sem ég hef áhuga fyrir,“ sagði gleðigjafinn Elín Fanndal.
Á dögunum deildi Elin Nolsøe Grethardsdóttir meðfylgjandi mynd inn á Facebook-síðuna „Verslun á netinu“ sem vakti mikla lukku. Vinur hennar hafði þá rekið augun í ódýra en sérstaklega fallega gyllta ramma á Ali Express og rifið upp greiðslukortið. Þegar sendingin barst var stærðin ekki alveg sú sem vinurinn hafði í huga, enda ekki af strumpakyni. Myndin fór að sjálfsögðu sigurför um samfélagsmiðla og einn gárunginn benti á hið augljósa: „Vá, hvar fékkstu svona stóran kveikjara.“
Nikíta J. Elfudóttir deildi þessari mynd með meðlimum „Verslunar á netinu“ á Facebook. Hún hafði rekið augun í fallegt og hræódýrt kattarbæli á Ali Express og fjárfesti í því án þess að hika. Ætlun hennar var að nota bælið fyrir kanínuna sína en þegar bælið barst henni í hendur varð ljóst að hvorki köttur né kanína myndi koma sér fyrir í því. Allt fór þó vel að lokum því lukkulegur Degu-eigandi fékk bælið að gjöf fyrir nagdýrið sitt.
Í nóvember 2016 fékk Brynja Lyngdal Magnúsdóttir skilaboð frá póstinum um að lítill pakki biði hennar. Hún hafði þá nokkru áður keypt lítinn sætan fjólubláan fíl á netinu. Það var hins vegar ekkert sætt við gulu plastandar-lyklakippuna sem beið hennar á pósthúsinu. Sturlað augnaráð andarinnar ærði óstöðuga og sagði einn notandi að honum liði eins og öndin góndi á hann. Undir það tók Brynja með þessum orðum: „Ég varð hálfhrædd. Eins og kvikindið væri andsetið af ömmu.“
