„Eftir rúmlega tvær vikur er Sigurpáll kominn af gjörgæslu og inn á deild. Nú tekur endurhæfing við. Sýnatakan leit vel út og virðist sem hjarta og líkami vinni vel saman og engin höfnun í gangi,“ skrifar Erna Björk Ingadóttir, eiginkona Sigurpáls Óskars Sigurðssonar en hann gekkst undir erfiða hjartaskiptiaðgerð í Gautaborg rétt fyrir síðustu mánaðamót.
Erna skrifar þessi skilaboð á stuðningssíðu Sigurpáls á Facebook en sjúkrasaga hans hefur verið mjög erfið. Við sögðum frá henni hér á dv.is fyrir tveimur vikum.
Árið 1998 greindist Sigurpáll Óskar Sigurðsson með krabbamein. Í kjölfar erfiðrar lyfjameðferðar læknaðist Sigurpáll af krabbameininu en 13 árum eftir það kom í ljós að krabbameinslyfin höfðu haft alvarlegar aukaverkanir og skaðað líffæri hans, þar á meðal hjartað. Af þessum ástæðum þurfti hann að gangast undir hjartaskiptiaðgerðin sem reyndist mjög erfið og var Sigurpáli haldið sofandi eftir aðgerðina í tvær vikur. Sem betur fer er hann nú á batavegi.
Veikindin hafa auk annars reynt mikið á fjárhag fjölskyldunnar en Sigurpáll hefur verið óvinnufær í þrjú ár. Vinir og vandmenn hafa gengist fyrir fjársöfnun til stuðnings Sigurpáli og fjölskyldu hans:
Margt smátt gerir eitt stórt og fyrir þá sem eru aflögufærir er reikningsnúmerið: 0537-26-251075 kt. 251075-5739