Mike Moore, fyrrverandi dómsmálaráðherra Mississippi, leggur nú drög að því að láta þau fyrirtæki borga sem framleiða, dreifa og selja svonefnd ópíóíðalyf.

Moore þessi er líklega best þekktur fyrir baráttu sína gegn tóbaksfyrirtækjum á tíunda áratugnum, en árið 1997 samþykktu bandarískir tóbaksframleiðendur að greiða 246 milljarða Bandaríkjadala í sjóð til að standa straum af heilbrigðisþjónustu við reykingafólk. Var það Moore sem höfðaði mál á hendur framleiðendunum með stuðningi bandarískra yfirvalda.

Moore þessi hyggst nú beita samskonar aðferð gegn framleiðendum ópíóíðalyfja, en eins og kunnugt er ánetjast sífellt fleiri Bandaríkjamenn hörðum fíkniefnum, eins og heróíni, eftir að hafa ánetjast lyfjum eins og OxyContin sem er einna þekktasta ópíóíðalyfið.

Í umfjöllun Bloomberg Businessweek, sem fjallar um málið, kemur fram að Moore ferðist nú um Bandaríkin til að leita eftir stuðningi ríkisstjóra og annarra embættismanna. Mun hann reyna að færa rök fyrir því að framleiðendur lyfjanna hafi með vísvitandi hætti talað niður hættuna af þeim með skelfilegum afleiðingum.

Hugmyndin er sú að útbúa svo margar stefnur gegn fyrirtækjunum að fjárhagslega ómögulegt verður fyrir þau að berjast gegn þeim einni í einu. Það er einmitt það sem gerðist fyrir tuttugu árum þegar samkomulag náðist við tóbaksfyrirtækin. Moore segir að markmiðið sé að peningarnir fari í sjóð sem mun nýtast þeim sem hafa ánetjast lyfjunum.